மகிழ்ச்சியான பன்றிக்குட்டி

பெருவெடிப்புக் கோட்பாடும் ஒரு பாலியல் பழமொழியும் சந்தித்துக்கொள்கிற புள்ளியில் நிலத்தை அகழ்ந்தவர்கள் கனவில் திளைத்திருக்கும் இரண்டு மகிழ்ச்சியான எலும்புத்துண்டுகளைக் கண்டார்கள் குயவரின் வெறிபிடித்த சக்கரத்தை கபாலத்துக்கு இடம்மாற்றும் கள்கலயங்கள் ஆகாசத்துக்கு அருகே மிதந்துகொண்டிருப்பதை ஞாயிறு புன்னகைமிக ரசித்துக்கொண்டுதானிருக்கிறது பஃறுளியிலிருந்து கூவத்துக்கான நீளத்தில் ஒரு செய்யுள் வார்த்து மணல்கடிகாரத்தின்முன் படையலிடும் பாணனின் பெருமூச்சு கொல்லரின் உலையைத் தூண்டுகிறது அணங்கின் நெஞ்செலும்பு பாளையைத் தட்டி வடிக்க ஏதுவாயிருக்கிறது “பாலூட்டிகள் மட்டுமே கனவு காண்கின்றன' உள இயல் நடனத்தில் கலயங்கள் முலைகளாய் ஆடுகின்றன. * சிறந்த கவிதை நூல் விருது - 2017 @ தமிழ்நாடு முற்போக்கு எழுத்தாளர் கலைஞர்கள் சங்கம் (வெம்பாக்கம் ஏ.பச்சையப்பன் - செல்லம்மாள் ப.ஜெகந்நாதன் நினைவு) ''லைஃப் இஸ் ப்யூட்டிஃபுல் !'' .................................................. நீங்கள் பாத்துக்கொண்டிருக்கும் நீலப்படத்தில் சன்னமாக எரியும் குண்டு பல்பு நான் சகிக்க முடியாத சாரயக்கடையின் கனத்த கூரையை தாங்கிக்கொண்டிருக்கும் தோலுரிந்த சவுக்குமரம் என் தந்தை பிரியாணிப்பொட்டலம் சுற்றிய நாளிதழில் கைப்பை திருடர்கள் பற்றிய செய்திக்குள் மூச்சிரைக்க ஓடும் நிழல் அம்மாவுடையது பேருந்துகளில் விற்கப்படும் அகர வரிசைப் புத்தகத்தில் ஆப்பிளுக்கு அருகிலிருக்கும் அழகியபூனை என் தங்கை நீங்கள் நினைப்பதுபோல் அல்ல இது மகிழ்ச்சியான ஒரு குடும்பத்தின் கதைதான் இதமான பனிப்பொழிவோடு டிசம்பர் பிறந்தது இளஞ்சிவப்பு நிற கிருஸ்துமஸ் நட்சத்திரத்தை சவுக்குமரத்தின் நெற்றியில் கட்டினார்கள் கொஞ்சம் கவனித்துப்பாருங்கள் அதற்குள் பலமாக சிரித்துக்கொண்டிருக்கும் குண்டுபல்பு என்னைப் போலவே இல்லை? பூனைக்குட்டியின் விரல்பற்றியபடி கேக் வாங்கிக்கொண்டிருக்கும் அந்த அம்மா கடைக்காரரிடம் அப்படி என்னதான் எழுதச் சொல்கிறாள் அதில்? ‘லைஃப் இஸ் ப்யூட்டிஃபுல் !’ எனக்காக மூன்று முறை அதை உரக்கச் சொல்லுங்களேன்..